[91748] in tlhIngan-Hol
[Tlhingan-hol] nuq bop bom: 'ay' wa'vatlh wejmaH wa':
daemon@ATHENA.MIT.EDU (Qov)
Wed Jan 18 12:45:28 2012
Date: Wed, 18 Jan 2012 09:43:46 -0800
To: "tlhingan-hol@kli.org" <tlhingan-hol@kli.org>
From: Qov <robyn@flyingstart.ca>
Errors-To: tlhingan-hol-bounces@stodi.digitalkingdom.org
vajar announced to qImyal that Lt. Hota'ro' had been promoted to
first officer when 'ungya died.
---
131
"bInep," jatlh qImyal. "wa'Hu' Danumbejta'chugh qatlh SIbI'
Daja'be'pu'? qatlh ja'be'pu' SoghlI'? Sogh ghaH 'e' Sovbe'pu' jay'."
Hota'ro' bejtaH Sa'.
Hota'ro' roSHa'moHlu'law'. QubtaHvIS vajar, jatlh ghutar, "ngugh
chechchu'pu' Hota'ro' Sogh, Sa' qImyal. ghuy'cha'! yaHDajDaq
vulchoHpu'. Heghpu' 'ungya Sogh DaHjaj po 'e' lIj. DotlhDaj
qawbe'chugh mumerbe'." nepbe' je ghutar.
SImlaw'taH qImyal. jatlh, "vaj 'Iv ghaH raQpo''e'?"
"ghutar," jatlh vajar. "Dujvo' vIQaylI'mo' DaH yaHDaj chu' HIjnISlu'."
"ra'wI' lupwI' jIHbe'. Qo'noS vergh'a' wIghoSchu'," jatlh qImyal.
"majQa'," jatlh vajar. "Qo'noS vergh'a' yaH cha'maH cha'Daq vumchoH
ghutar." jIH Sen ghutar 'ej SIbI' lajlu'. Dalmo' vergh'a', reH mang
lajrup. yayHom chavta'. beq neHlaw'pu'mo' qImyal, Qanta'. chaq
lo'laHbe'. ghaytan potlhbe' 'ach Sa' lutojta'. noD Sa' 'e' loS.
jatlh Sa', "raQpo' ghaHchugh Hung mIw le'--"
jatlh vajar, "Sa' SoHmo' qavuv, qaH, 'ach jIH beqwIj je jupIHtaHmo'
jIpuQ. Dujmaj bonuDta'. 'aHmaj bonuDta'. tlhIngan matlh maH. quvmaj
boHonchugh SIbI' ghopum. Hung mIwmeyvetlh DI- DI---"
jatlh ghutar, "HungpIn jIHmo' Seng vIghovneS Sa'. Duj quv choqtaHmeH
ra'wI', quvHa'ghach luqembe' mebpu' 'e' 'olnISchu' ra'wI', 'ach
tlhIngan quv mawbe'meH Qatlh Qu'. qavuvmeH 'ej quvwIj vItobmeH
munuDchu' HunglIj 'e' vISap, ghIbchugh HoDwI'. chopumbe' 'e'
vISovchu' 'ej *veS* quv vIchoq 'e' DavoqlaH."
<HungpIn> per'eghtaHmo' ghutar mon vajar. 'avwI' chu' ghaH ghutar'e'.
puch Say'moHwI' ghaH. 'ach Hoch Qu' ta'choHDI' buSchu' 'ej wo'
quvmoHmeH ta'chu'. lagh tlhochbe' vajar. jatlh, "vIghIb 'ej jIH munuD
je HunglIj 'e' vIghIb." Sappa' yevqu' Hota'ro' 'ach tagha' jatlh,
"pagh vISo' 'e' vItobvIpbe'qu'." jeQlaw' Sogh 'ej pe'vIl jatlh.
jatlh, "qechraj vIlaj. quvraj botobchu'ta'DI' rInjaj
pIHchuqtaHghachvam." 'avwI'pu'DajvaD jatlh, "Hung pa'Daq laghvam
Soghvam je tIDor. lunuDlu'chu'qu' 'e' yI'ol."
"qaHpu'," jatlh 'avwI' 'ej DevchoH.
---
SKI: To keep the captain from blowing his top, ghutar volunteers for
a body search.
_______________________________________________
Tlhingan-hol mailing list
Tlhingan-hol@stodi.digitalkingdom.org
http://stodi.digitalkingdom.org/mailman/listinfo/tlhingan-hol
