[89198] in tlhIngan-Hol
nuq bop bom: 'ay' Soch
daemon@ATHENA.MIT.EDU (Robyn Stewart)
Sat Aug 27 11:26:52 2011
Date: Sat, 27 Aug 2011 08:19:31 -0700
To: tlhIngan-Hol@kli.org
From: Robyn Stewart <robyn@flyingstart.ca>
Errors-to: tlhingan-hol-bounce@kli.org
Reply-to: tlhingan-hol@kli.org
Here is today's installment of the story of vajar HoD and his gallant crew.
Comments, corrections, criticisms gratefully appreciated. SaQuchmeH
'ej jIDub'eghmoH vIqonlI'.
7
Duj pImDaq, HoD quSDaq ba'taH HoD pIm. 'oy'be' DeSDaj'e' 'ach
tlhaymeyDaq DeSDu' So'.
"HoD," jatlh QeDpIn ('ach nov Hol lo'), "DujHey tu'pu' chuq'a' noch.
wej Segh ngu'ta' De'wI'."
"ghoch yISIm," jatlh HoD.
"vIHbe'law'," jatlh QeDpIn. "vIHchugh, chuqvamvo' wItu'laHbe'."
"'oHDaq He yIghoS," ra' HoD. "Dangu'DI' HISovmoH."
tlhoS vIHbe'chugh Duj, Qotlhlu'pu', lonlu'pu', pagh vay' Daj tu'ta'.
ghaHvaD Huch bajlaH Hoch ghu'. Qotlhlu'pu'chugh ghaytan lutI'meH pagh
beq toDmeH DIlqang. lonlu'pu'chugh jonlaH. 'ej vay' Daj tu'chugh vaj
ghaytan ghaHvaD je Daj.
"HaStaDaq," jatlh HoD.
Hopqu'mo' Huvbe' 'a jumlaw'. cha' pIvghor HanDoghmey ghajbe'law'.
pIvghor Hutlhchugh, chaq puq poH Duj 'oH. pIj Daj nov cham. pay' Duj
ghovchoH HoD. "yImev." jatlh HoD. "tlhInganpu' chaH. yIHotlh."
jang QeDpIn. "nuH lurIHbe'lu'. Hongghor rIHbe'lu'. bachHa'law'mo'
lolSeHcha neH ghoS. naQ Som 'ej QaptaH yIntagh. SaH loS yInroH."
"yIDoH," ra' HoD.
"Qotlhlu'pu'." jatlh chIjwI'. "tlhIngan chaH 'ach QaQ tlhIngan wo' DeQmey."
chIjwI'vaD "tlhIngan DaqIHpu''a'?" jatlh HoD?
"ghobe', qaH," jang.
"Ha'DIbaH rur tlhIngan," jatlh HoD. "Ha'DIbaH rIQ DaQaH 'e'
DanIDchugh, ghaytan DuHoH. chaq DIlupmeH tlhInganpu'vetlh DIlqang, 'a
chaq DIlup luneHqu' 'a tuHmo' nuHoH 'ej Duj lunIH. chaq DIlup
luneHbe', 'a vay' lujoy'laH 'e' lunej neH." yev HoD. "yIDoH."
-----
DaHjaj Heghmo' pagh ghaytan Su'IQ, vaj joy'law'ghach vIchupta'. :-)
- Qov
