[90191] in tlhIngan-Hol
[Tlhingan-hol] peDbogh bIQtIq loD: 'ay' cha'
daemon@ATHENA.MIT.EDU (Rohan Fenwick - QeS 'utlh)
Sun Oct 23 01:32:43 2011
From: Rohan Fenwick - QeS 'utlh <qeslagh@hotmail.com>
To: <tlhingan-hol@kli.org>
Date: Sun, 23 Oct 2011 15:32:24 +1000
Errors-To: tlhingan-hol-bounces@stodi.digitalkingdom.org
No need for more intro here, one hopes, so straight into it. This is
Part 2 of "The Man from Snowy River"; comments are welcome as usual.
yItIv.
peDbogh bIQtIq loD: 'ay' cha'
<< qoSyuSqo' [1] HuD DopDaq pumbogh <<peDbogh bIQtIq>>Daq boghpu',
yoSvetlhDaq jenbej HuDmey, lenglu'meH ghegh,
qettaHvIS Sargh, pa' nagh let mupDI' lem, ngIq mupmo' panchu';
yapbej Qu'Daj ta'laHbogh vay''e', tob'egh.
HuDDaq peDbogh bIQtIq lIghwI'pu' juH'e' lutu'lu'pu',
pa' HuD'a'mey tIn chev jaHtaHbogh bIQtIq;
ben law' SepvamDaq jIlengtaH, 'ej po'bej lIghwI' law'qu',
'ach Dat Dach nuv nIv, HoSghaj lIghwI'vetlh tIq. >>
vaj mej ghaH - Sargh ghom lutu', DIghna' ngemHom lujuSchoHDI',
pay' pa'vo' HuD'a' 'aqroSDaq qetchoHchu',
'ej ra' loDvetlh ngo', << maqochpu', SIbI' bIH botlha'nISlI',
DaH SulIghtaHvIS penguq'eghmoHQo'qu'.
tlhanSIy, nIHDaq bIH Datlhe'nISmoH 'ej batlh DanIDnISbej,
loD, bIlIghtaHvIS yIjaq 'ej pagh yIHaj,
HuDmeyvetlhDaq QantaHghach lutu'chugh, reH Sargh ghom Danej,
not boghpu' SamlaHbogh lIghwI' 'e' yIlaj. >>
vaj bIH tlhe'meH lIghchoH tlhanSIy - DopDaq SarghDaj qetmoHlI';
DopDaq roD lIgh jaqbejbogh lIghwI'pu' po';
juSmeH He cher SarghDaj qetmoHtaHvIS; Sargh ghomvetlh qIHDI'
HuDmeyDaq jach wab tIn, 'oy'naQDaj chu'mo'.
'oy'naQ QachtaHvIS ngugh wa' tup cha' tup ghap mev Sarghmey ghom,
'ach tugh HuD lumuSHa'qu'chu'bogh lulegh,
'oy'naQvetlh wabmo' luHajbejbogh pay' Haw'choH bIH 'ej nom,
'ej SIbI' HuD ngem lumuSHa'bogh luvegh.
ghIq nom ghom lutlha' lIghwI', 'ej pa' nagh let mupDI' lemDu',
jevchoHlaw' 'uj'a' law' Saw'bogh ngechmey qIj,
'oy'naQmeychaj chu'choHDI' je, chen je taHtaHbogh wab qu',
chaH Dung qojmeyvo' HuDvo' je jach net 'Ij.
HuD luSaltaH, reH luSaltaH, DIch lulengtaH Salbogh Sargh,
Daqmey So'bogh Sormey Sar leng, SaltaHvIS.
'ej jatlhDI' qanwI', qu' ghaH: << ghaytan ghomvam'e' maH nuchargh,
latlh DopDaq bIH SeHlaH pagh loD 'e' vIDIS. >>
[1] "Kosciuszko", Australia's highest mountain.
QeS 'utlh
_______________________________________________
Tlhingan-hol mailing list
Tlhingan-hol@stodi.digitalkingdom.org
http://stodi.digitalkingdom.org/mailman/listinfo/tlhingan-hol
