[89653] in tlhIngan-Hol
chIjwI' tIQ bom: 'ay' vagh
daemon@ATHENA.MIT.EDU (Rohan Fenwick - QeS 'utlh)
Tue Sep 13 10:56:12 2011
From: Rohan Fenwick - QeS 'utlh <qeslagh@hotmail.com>
To: <tlhingan-hol@kli.org>
Date: Wed, 14 Sep 2011 00:49:48 +1000
Errors-to: tlhingan-hol-bounce@kli.org
Reply-to: tlhingan-hol@kli.org
I faced some challenges at the start but as before, once I got into my groove,
things started coming much easier. This is the longest of the seven parts of the
bom (26 verses), and parts of it still feel a touch forced, but there are some
parts I think are quite powerful. This is Part V: in which the dead crew arise
to sail the ship onwards under a strange power, and the Mariner realises his
penance is not yet complete.
Comments, suggestions, criticisms, threats etc. are all welcome once more.
chIjwI' tIQ bom: 'ay' vagh
'o QongtaHghach! HoSghajwI'maj
'ej Hoch qo' Sep bang SoH!
qeylIS HoSghaj'e' naDlu'jaj!
QI'tu'vo' ghoSbejta' qa'Daj
'ej jIH muQongchoHmoH.
qaStaHvIS poH nI', choQ ravDaq
ratlhpu'bogh bIQ ngaSwI'
tebchu'pu' choS bIQ 'e' vInaj;
SISqu' jIvemchoHDI'.
yIQqu' wuSwIj, bIrqu' HughwIj,
'ej SutwIj Hap HaHlu';
tlhutlh porghwIj, 'ej jInajtaHvIS
jItlhutlhchoHqu'bejpu'.
jIvIHchoHDI', jI'ughbe'qu',
Dachlaw' ghIvDu'wIj Sar;
jIQongtaHvIS jIHegh 'ej qa'
vImoj tlhoS 'e' vIHar.
'ej tugh jachqu'bogh SuS vIQoy:
DujDaq cholbe'choHpu';
'ach SuSvetlh wabmo' QomchoHpu'
langbogh vo'wI' Qopqu'.
pay' yInchoHqu' maH Dung muD'e'!
boch wa'vatlh joqwI' tuj;
naDevvo' moD bIH 'ej pa' moD!
'ej Dat joqwI'mey jojDaq QoD
'ej mI' je Hovmey puj.
chuSchoH chollI'bogh SuS net 'Ij,
joqbogh jIb rur joqwI';
'ej DujDaq SISqu' wa' 'eng qIj;
maS'e' 'eng HeH veghlI'.
qIjbogh 'eng jeDDaq chenchoH Qargh,
'ej 'eng tlhejtaH maS'e';
'engvo' pumchoH chal 'ul'a' qu',
qoj jenvo' pumbogh bIQ rurchu',
pumDI' HeDaj choHbe'.
DujDaq cholbe'choHpu' SuS'a',
'ach DaH lengqa'taH Duj!
chal 'ul bIngDaq, maS bIngDaq je
jatchoH beq lommey nuj.
jatchoH, vIHchoH, QamchoH je Hoch,
vIHbe' mInDu', tam chaH;
Hu'DI' Heghpu'bogh loDvetlh, Huj;
jInajchugh je HujtaH.
lurgh cher DeghwI', 'ej lengtaH Duj,
'ach SuS'e', not qaSqu';
yaH motlhDaq Duj tlhegh raQchoH 'ej
Qu' motlhvaD vum beqpu';
janmey rurqu'bogh ghIvchaj pep -
beqpu' ghommaj Hajlu'.
jIH retlhDaq QamtaH tey'loDwI',
mavumtaHvIS pa' ratlh;
ngIq tlhegh wIluH, porghvetlh jIH je,
'ach jIHvaD not mu' jatlh.
< choghIjtaHqu', 'o chIjwI' tIQ! >
< SawwI' lopwI', yIjot!
lomchajDaq cheghbogh qa' chaHbe'
lujoy'lu'mo' Haw'bogh qa''e',
'ach qaS qa' quvqu' yot:
'ej qaSDI' choS - DeSchaj chaghmoH,
'ej Duj botlhDaq chen ghom;
QIt wab 'ey tlhuDchoH nujDu'chaj,
'ej porghmeychajvo' bom.
muDechtaHvIS puv Hoch wab 'ey,
ghIq pay' julDaq moD bIH;
QIt cheghqa' wab; nIteb DaH leng,
'ej DaH nItebHa' vIH.
rut bomchoH qanraD 'e' vIQoy,
puvtaHvIS pumlaw' bom;
rut bom je latlh bo'Deghmey law',
bIQ'a''e' muD'e' je teblaw'
'IHbogh bomchu'ghachHom!
'ej DaH Hoch QoQ jan rur wabvetlh,
DaH Dov'agh mob rurqu';
'ej DaH qa' quv bom mojchoHlaw',
'oHmo' tamchoH QI'tu'.
ghIq van; 'ach po Hoch vo'wI'vo'
wab 'IHqu''e' Qoylu';
wab'e' tlhuDbogh poH ghun bIQtIq
So'lu'pu'bogh rurchu',
ram Hoch QongtaHvIS SormeyvaD
bombogh bIQtIq bom mu'.
qaSpa' DungluQ malengtaH maH,
'ach not narghchoH SuSHom,
QIt lengtaH Duj 'ej Hab bIQ'a',
Duj vo'bogh vay' So' Som.
'eng bIr qo'vo' tlhejbogh qa''e'
'IvDaj Saw' vagh 'uj'a',
Duj bIngDaq lengtaH ghaH net tlhoj,
Duj vo'wI'na' mojta'.
DungluQ wab nI' mevmoH vo'wI',
'ej Dujmaj'e', mevqa'.
maH DungDaq ratlhtaHvIS jul'e',
bIQ'a'Daq Duj ngaQmoH:
'ach qaSpu'DI' tup, vIHqa' Duj,
'ej vIHDI' pay' gheghchoH.
pay' DuvmoHlu', pay' HeDmoHlu'
'ej vIHDI' pay' gheghchoH.
Supqu'bogh ngem Sargh rurtaHvIS
ghIq jImqu' Duj ngaDHa';
pe'vIl nachwIjDaq 'IwwIj yuv,
muvulchoHqu'moHta'.
jIvulmo', rep vItoghbe'pu',
vaj poH vIperlaHbe';
'ach jIHDaq cheghqa'pa' yInwIj,
vay' ghov qa'wI', 'ej vay' vI'Ij:
ja'chuq cha' ghoghmey'e'.
< ghaH'a'? > jatlh wa'. < 'o qeylIS qa'!
toH, loDvetlh'e' ghaH'a'?
mIghqu'chu'mo' baHjanDaj lo',
'ej yatqap HoHchu'ta'.
bo'Degh muSHa'qu'pu' qa'vam,
'eng bIr qo'vetlh rewbe';
'ej HoHmeH baHjan lo'bogh loD
muSHa' je bo'Degh'e'. >
latlh ghogh tam law' ghoghvetlh tam puS,
jatlhDI', tlhupwI' rurchu';
jatlh ghaH: < jIp'a' DIlpu' loDvam,
'ej jIp'a' DIltaHqu'. >
QeS 'utlh
