[89426] in tlhIngan-Hol
nuq bop bom: 'ay' wa'maH jav
daemon@ATHENA.MIT.EDU (Robyn Stewart)
Mon Sep 5 11:54:42 2011
Date: Mon, 05 Sep 2011 08:43:06 -0700
To: tlhIngan-Hol@kli.org
From: Robyn Stewart <robyn@flyingstart.ca>
Errors-to: tlhingan-hol-bounce@kli.org
Reply-to: tlhingan-hol@kli.org
The Klingon logorrhea continues. Comments, corrections or complaints to Qov.
16
yuQDaq pawpa' Duj, ngIq[8] yaSvaD Qu' De' Qum HoD. ngevrupmeH 'ej tep
lajrupmeH ja'chuq chelwI' teppIn je. reH Qu' nungbogh vanglI'ghach'e'
tIv HoD. SeymoH. tay'taHvIS beq Qu' ta'rupchoHmo' DuHlaw' Hoch.
meHvo' "HoD, ghoch wIchollI'," jatlh QumpIn. meHDaq chegh HoD 'ej
quSDajDaq ba'choH. "rI'Se' yIpoSmoH" jatlh.
"poStaH rI'Se'," jang QumpIn.
yuQ SeHwI'vaD jatlh 'ej bavmeH chaw' Suq, ghIq tlhIngan Duy rI'.
'eSSIm 'oH pongDaj'e'.
'eSSIm qab cha'choHDI' HaSta, be' ghaH 'eSSIm'e' net legh. qIj DIrDaj
'ej Hurghqu'. vIlba' QuchDaj 'ej tIq jIb. HIp tuQbe'mo' buQqu'be'.
rI'mo' nov mISba' tlhIngan. jup mu' nop Mahoun. tlhIngan tIgh Sov.
tlhIngan lunuQ malja' bopbe'bogh mu'mey'e'. jatlh "SoHvaD QIn vIHIj."
"yIngeH," jatlh tlhIngan.
"lI'wI'vaD loQ pegh jabbI'IDvam. ruQ vIHIj 'e' maS," jatlh Mahoun.
"jolmeH Quv SalI'lI'," jatlh tlhIngan.
"maj," jang Mahoun. "mutlhej yaSwI'." rIn jabbI'ID.
beqvaD jatlh HoD "maQol jIH QeDpIn je. tlhInganvaD ta vInob.
mangevmeH 'ebmey DInuD. tugh reja'."
"SuyoH," jatlh chIjwI'.
"malja' wIHuq neH. qay'be'," jatlh HoD.
jolpa'Daq bejchuq HoD QeDpIn je. qoghchajDaq tajmey tuQ. tlhIngan Suv
'e' luHechbe' 'ach pagh nuH qengchugh puj chaH 'e' luHar tlhInganpu'.
"bIjolrup'a'?" jatlh QeDpIn.
"jIjolrup 'a tlhIngan vIqIHrup ... wej 'e' vISov." jolpat SeHlawDaq
loS jonwI'. ghaHvaD "ghojol" jatlh HoD.
----
[8] I officially love this word.
----
SKI: Captain Mahoun ensures that all his departments have the
information they need to do business, then prepares to beam down to
deliver the message to the Klingon envoy.
