[89166] in tlhIngan-Hol
nuq bop bom: 'ay' wej
daemon@ATHENA.MIT.EDU (Robyn Stewart)
Tue Aug 23 13:43:50 2011
Date: Tue, 23 Aug 2011 10:32:08 -0700
To: tlhIngan-Hol@kli.org
From: Robyn Stewart <robyn@flyingstart.ca>
Errors-to: tlhingan-hol-bounce@kli.org
Reply-to: tlhingan-hol@kli.org
tlhIHvaD lutwIj 'ay' wejDIch vImuch. qechmeylIjmo' vIDub 'e' vInID.
If you spot a mistake or something is not clear, please tell me.
3
nuq bop bom 'e' SIvtaH vajar 'ach not Sov. novvetlhvaD pagh De' Sov.
'a chaq weHvetlh ta SamlaH. ghaytan Hol jatlhbogh nov lungu' joy'wI'
ta. HaStaHomDaq nIn tamey qIl vajar 'ej Qu'vetlh ta nejchoH. may'Duj
tamey SamlaHbe'. vajar merbe'. ghaytan luchoqlu'be', pay' rInchoHmo'
Qu'vetlh. ngaq Duj tamey Sam. DujDaq SaHtaH wa' qama' net qon, 'a
pagh nov ngu'bogh De' qonlu'. QI' pegh 'oHlaw'. merbe' je.
tamey Hotlhqa' vajar. ngaq Duj ta laDtaHvIS, pongDaj'e' tu'. HoDvaD
vajarmo' beplaw'ta' latlh 'avwI'. tavetlh laDDI' vajar, mu' QeH
jatlh. lubejchoH meH yaSpu'. "HoD?" jatlh yaS wa'DIch.
yepHa'choHDI' HoD Hegh, 'a roD ghaHmo' Heghbe' beqDaj Qup. roD
yepHa'choHDI' HoD HoH beqDaj Qup. beqDaj Qorghqu' vajar 'a yInlu'taH
'e' bajnISlu'. yaS wa'DIchvaD "pe'vIl mu'qaDmey tIbach," jatlh vajar.
Hagh yaS wa'DIch 'ej leS Hoch. yaS wa'DIch voqchu' vajar, vaj
HeghnISDI' vajar HoH yaS wa'DIch 'e' voq.
ta laDqa' vajar. ghaHmo' bepmo' latlh 'avwI'. Dughbe' ghaH ja'.
bIghHa' Hung HotlhwI' ta nuDta' HoDvetlh. novvaD Qel rI' vajar 'e'
tu' ghIq nov bejqu' vajar 'e' legh. Dughchu' vajar 'e' lu'ang tamey,
'ej buD latlh 'avwI' lu'ang je. yo' la''a'vaD vajar naDta' HoD.
naDvetlhmo' DujvamDaq meH yaS mojpu'. 'ej laHDajmo' DaH HoD ghaH.
mach Duj 'ach batlh wo' lutoy' 'ej qu' beq. vagh chaH: vajar HoD,
'ungya (yaS wa'DIch), Hota'ro' (DeghwI'), ghutar (Hung yaS), ghIrel
(jonwI') je. DaH meHDaq chaHtaH vajar, 'ungya' Hota'ro' je. nuH pat
nuDlI' ghIrel 'ej Qonglaw'taH ghutar. tugh QongchoH vajar. vemmoH
vay' qaSchugh wanI' Daj.
HaStaHom chu'Ha' vajar 'ej QamchoH. pay' ghum SeHlaw. wIyDaq bejchoH
'ach pagh cha'. jIm Duj ghIq ronqu' 'ej vajar pummoH. pumtaHvIS
Qan'eghmeH ghop SIch 'ach ghopDaq SaqDI' ghaH, wab nI' Qoy 'ej bep
SIQ DeSDaj. yeb SIghDI' ghurqu' 'oy' 'ej chuS Hom. ghuy'cha'. nIH DeS
Hom ghorlaw'pu'. Duj SeHmeH 'ej ghu' chovmeH vumlI'mo' beq, chaq HoD
qabDaq 'oy' luleghbe'pu'. yaS wa'DIchvaD jatlh vajar, "Dotlh!"
