[89124] in tlhIngan-Hol
lut: nuq bop bom: 'ay' wa'
daemon@ATHENA.MIT.EDU (Robyn Stewart)
Sun Aug 21 12:45:38 2011
Date: Sun, 21 Aug 2011 09:35:03 -0700
To: tlhIngan-Hol@kli.org
From: Robyn Stewart <robyn@flyingstart.ca>
Errors-to: tlhingan-hol-bounce@kli.org
Reply-to: tlhingan-hol@kli.org
1
meHDaq yaHDajDaq ba' vajar HoD. ghaH tlhopDaq nIn tamey cha'
HaStaHom, 'ach nIn natlhbogh ngIvmeH DujDaj qelbe' HoD.
DujDaj HubtaHvIS Hegh 'e' tul Hoch tlhIngan net Sov. 'a loQ
tlhoch'egh qechvetlh. chIch HeghmeH tlhIngan Suvbe'. pIvchugh Hegh
nejbe' ghaH. QapmeH Suv. yIn Qap chavchoHDI' SuvwI' 'ej Hoch jaj
yInmeH SuvnISbe'DI', may' bopchu'be'bogh yIn'e' qelchoH. wo'vaD
qa'vaD quvvaD je Suvba', 'ach wo' qa' je je'meH 'ut je chavmey'e'
Delbe'bogh jagh 'Iw. may' neH buSchugh SuvwI', qanchoHDI' ghaH Hegh
nejchoHmo' yepHa'choH. HoD qan le'yo'mo' Hegh tlhIngan Qup 'ej Duj
chIl tlhIngan wo'. qaSbe'meH SeQpIr ghItlhmey, HIq qub, QoQ Qatlh,
rurbogh Qu' joq SaHnIS HoD. ngervetlh Har vajar. loD qan mojpa'
Qu'Hom neH, 'a laD 'e' tIvbe'. HIq tlhutlh 'e' tIv 'ach lubelmoH Hoch
HIqmey. qubchugh SaHbe'. HIq tlhutlhtaHvIS bom 'e' tIv. bommey
qatchugh QoQ jan, chu'wI'pu' naD 'ach chuS'ugh Seghmey ngu'laHbe'.
wa'logh vajar DuQchu' QoQ. wanI' jum 'oH. ngIvmeH DujvamDaq
vumchoHpa' vajar, ngaqmeH lupwI'Daq Hung yaS ghaH. may'Duj Dor
ngaqmeH Duj. nov Duj jonta' chang'eng. may'DujDaq qama'pu' HochHom
luweghlu' 'ach ngaqmeH Duj bIghHa' machDaq wa' nov tu'lu'. potlhbe'
ghaH. loQ lujoy'ta' 'ach rIQqu'be'. bIghHa'Daq ba' neH. 'IQlaw'. chaq
mobmo' 'IQ. rut bom nov. jatlhtaHvIS ghaH puj ghoghDaj 'ej vaqHa',
'ach bomchoHDI' rachchoH 'ej SuS HoS rech. nov Hol yajbe'chu' vajar
'ach ghaH DuQchu' wabmey watlh lIngbogh nov ghogh. 'avwI'vaD jatlh
qama' net tuch. bomchoHDI' nov luqIp 'ej lutammoH latlh 'avwI' 'e'
Sov vajar 'ach vajarvaD pIm bom QIch je, vaj bom nov 'e' chaw' vajar.
rut bompa' pagh bompu'DI' nov loQ jatlh. jatlhchoHDI' nov reH qu'choH
vajar 'ej jach bIjatlh 'e' yImev. Dugh ghaH 'ach may 'ej naSbe'.
