[88831] in tlhIngan-Hol
qoqqoqmey - jaj loSmaH
daemon@ATHENA.MIT.EDU (ghunchu'wI' 'utlh)
Thu Feb 17 11:46:41 2011
Date: Thu, 17 Feb 2011 11:36:17 -0500
From: "ghunchu'wI' 'utlh" <qunchuy@alcaco.net>
To: tlhingan-hol@kli.org
Errors-to: tlhingan-hol-bounce@kli.org
Reply-to: tlhingan-hol@kli.org
DaHjaj mu'qaDmey vIbach.
wa'Hu' ram nuja' qoqpIn rIn DeS.
nuja' pujmo' nguSDI' tIghongQo'.
ja' SIchtaHvIS DeS, yIpepQo'.
ja' DeS DapeptaHvIS DeS, yISIchQo'.
nuqjatlh?
DoS jen wIqIplaH 'e' bot vuSwI'Heyvam.
vIyajHa'ba' qar'a'?
ghobe'.
vIyajchu'.
DaHjaj yaH vIghoS.
qoq wIchu' ghunwI'pu' jIH je.
DeS wIchu'...'e' wInID.
QIt vIH.
SIchtaHvIS wIpeplaHbe'.
wIpeppu'DI' SIchlaHbe'.
lo'laHbe' DeSqoqvam.
SaHtaHvIS ghojwI'pu' jIQut vIneHbe'.
vaj mu'qaDmey vIjatlhtaHvIS tlhIngan Hol vIjach.
<<ghuy'cha'! Hu'tegh! baQa'!>>
loQ Hagh 'op.
<<DeS nguSDI' patvam 'oghba' targh 'o'!>>
mubejtaH Hoch 'ej mu'qaDvetlh vImugh.
Haghqu' 'op.
mISba' neH latlhpu'.
qaStaHvIS wej rep DeS wIchov.
wIjuv.
wIpoj.
latlh nguSDI'mey DIqel.
latlh patmey DIqel.
tagha' paw qoqpIn.
tu'HomI'raH 'oH DeS'e' 'e' lu'agh ghojwI'pu'.
ja' qoqpIn <<vaj mataghpa'.>>
qechmeyDaj chu' Del.
DIqel.
ghaHvaD latlh DuHmey DImuch wIneH.
'ach nuqDaq ghaHtaH?
va, mejlaw'pu'.
qechDaj pu'jIn ghItlhmeH juHDajDaq cheghta'.
DeSvam vImuS.
'ach QaptaH rutlhmey.
qaStaHvIS rep Qav mareH.
che'ronDaq qoq wIlan 'ej qeq DeghwI'pu'.
vaDbej qoq.
nom vIH.
nom tlhe'.
not QapchoHchugh DeSqoqDaj, chaq gholmey qoqmey yIvlaH.
jav leS qoq wIHIjnIS rIntaH.
-- ghunchu'wI'
