[88718] in tlhIngan-Hol
lut pIm: juHDuj
daemon@ATHENA.MIT.EDU (ghunchu'wI' 'utlh)
Mon Jan 31 15:53:20 2011
Date: Mon, 31 Jan 2011 15:39:20 -0500
From: "ghunchu'wI' 'utlh" <qunchuy@alcaco.net>
To: tlhingan-hol@kli.org
Errors-to: tlhingan-hol-bounce@kli.org
Reply-to: tlhingan-hol@kli.org
pelop! qoqmey vIqelbe'choH. juHDuj vIqel.
chorghHu' juHDuj vIje'. 'oH vIleghpu'be' 'ach Delbogh De' vIlaD 'ej
vIparHa'. maQum jIH ngevwI' je. maghommeH jaj wIwIv. jajvetlh jIleng
'ej juHDuj vISuq 'e' wInab. Huch vIboSchoH.
cha'Hu' Hoq wItagh jIH be'nalwI' je. juHmajDaq ratlh SoSDaj puqloDma'
je. qaStaHvIS loS rep maleng. ghochDaq mapawDI' pup rep. juHDuj wInuD.
chu' rutlhmey mep. Say' qoD Hur je. Hoch juHDuj pat Del 'ej 'agh
ngevwI'. bIrqu'mo' bIQ patmey 'aghlaHbe'.
cha' SengHommeymo' jIbep. SIbI' vangchoH ngevwI' 'ej muQuchmoH.
poSQo'bogh ngaQwI' tam. Duy' HIvje' 'uchwI'mey 'e' vI'ang 'ej
'uchwI'mey chu' ngeH 'e' lay ghaH.
jIyon. jIqI'. vIDIl. jItlhap. wa'vatlh cha'maH tlho'ren nIn qeng.
HutmaH vagh vIchel. ghuycha' waghqu'! vItebnISqa'pa' wejvatlh wejmaH
qelI'qam leng net pIH.
juHDaq macheghchoH. qaStaHvIS loS rep maleng. Qapqu' Duj. vaQ QuQ. HoS
mevmoHwI. Qap tujmoHwI'. loQ QeyHa' DeghwI' quS. loQ vIH 'ach wej
qay'.
Dor pem 'ej HurghchoH chal. loQ peDchoH. yIQ He 'ej latlh Seng vItu'.
QIvqu' 'et Qorwagh bI'wI'Du'. HuvmoHbe'. ngoH neH. tugh qa'meH
vIjomnISbej.
juHDaq mapaw. pa' juHDuj vIbergh. QaQ Duj. Do'Ha' QaQbe' juH
ghu'...'ach pIm lutvetlh'e'.
-- ghunchu'wI'
