[87274] in tlhIngan-Hol
much Doj vIbej
daemon@ATHENA.MIT.EDU (Terrence Donnelly)
Sun Nov 29 13:07:27 2009
Date: Sun, 29 Nov 2009 10:05:10 -0800 (PST)
From: Terrence Donnelly <terrence.donnelly@sbcglobal.net>
To: tlhIngan-Hol@kli.org
Errors-to: tlhingan-hol-bounce@kli.org
Reply-to: tlhingan-hol@kli.org
cha'Hu' ram much Dojqu' vIbej. "A Klingon Christmas Carol" 'oH muchvam pong'e'. muchvam qonwI'pu'vaD mughwI'pu'vaD DawI'pu'vaD je wa' mu' vIjatlh vIneH: <yay!>. ghobe': <yay'a'!>. not much rap vIleghpu', 'ej not vIleghqa' 'e' vIpIH.
*SQuja' pujwI' Del "A Klingon Christmas Carol" much, wa' ram nI' SIQtaHvIS ghaH. qaStaHvIS Hoch yInDaj, Huch quv law', Hoch quv puS 'e' noH *SQuja'. Huch quvmoHqu'mo' *SQuja', *bel, bangDaj Qup, pollaHtaHbe', 'ej nIteb batlh Hegh *bel. DaH qanqu' *SQuja', 'ej mob, 'ej quv Hutlh. 'ach ramvetlh, wejlogh *SQuja' Such qeylIS qa'. jIqarqu'meH, jIjatlhnISqa': <luSuch wej qeylISpu': ben qeylIS, DaHjaj qeylIS, nem qeylIS je.> tagha' SuvwI' tIqDaj Sam *SQuja', 'ej batlh chav. much 'aghlu'taHvIS, tlhIngan qech, tlhIngan tIgh je QIj wa' vulqangan.
qurgh lungqIj, qochpu'lI' je, Savanqu'! po' much qonwI'pu', mughwI'pu' je. po' je DawI'pu'! jatlhtaHvIS DawI', HaStaDaq tlhIngan Hol SoQmey 'oSbogh DIvI' Hol mu'mey'e' lucha'lu', 'ach pov DawI'pu' QIchmey, 'ej ngeD mu'meychaj yajmeH Qu', vaj pIj HaSta vIbejnISbe'.
'IHqu' jechchaj, Quchchaj je; tlhInganna' rurbej. *vreD ghaH *SQuja' lorloD'e'. *vreD juHDaq qaS lopno'. lopno'Daq qaS betleH qaD. betleH QachtaHvIS 'op qaDwI', *vreD je, jop 'ej way' 'ej Hoch qaDwI' jeytaH *vreD. mupIlmoH!
muDuQ much lut. tlhIngan Hol luyajlaHbe'bogh bejwI'pu''e' (chovnatlh: be'nalwI') DuQ je. teH, "A Klingon Christmas Carol" pong Qoylu'DI', <qID neH 'oHba'> ghaytan net Qub. 'ach much bejlu'taHvIS, qID 'oHbe' tugh net tlhoj. lutna' Del much, 'ej tlhInganpu' chaH DawI'pu''e' tugh net HarlaH. jIHvaD potlhchoH Sanchaj. *tImHomvaD Hegh bey lIngDI' *tImHom Sos, qID 'oHbe'bej. muDuQqu', 'ej Hagh pagh bejwI'.
narghchugh muchvam bejmeH 'eb, nom yI'uch! not bIpay.
-- ter'eS
