[2482] in tlhIngan-Hol
KSRP: paghmo tIn mIS, 3.1-3.3
daemon@ATHENA.MIT.EDU (daemon@ATHENA.MIT.EDU)
Fri Jan 7 22:28:12 1994
Reply-To: "Klingon Language List" <tlhIngan-Hol@klingon.East.Sun.COM>
From: nsn@vis.mu.OZ.AU (Nick NICHOLAS)
To: "Klingon Language List" <tlhIngan-Hol@klingon.East.Sun.COM>
Date: Sat, 8 Jan 94 14:25:45 EDT
3.1.
'el *Hero*, *ma'rIgharet*, *'urSula* je
H: *ma'rIgharet* QaQ, mebpa'Daq DaH yIqet.
pa' *be'terIS*, be'nI''a'wI' Datu',
ja'chuqtaHvIS joH *tlhaw'DIyo* je ghaH je.
nachDopDajDaq bItamtaHvIS yIja':
nachSorghomDaq yIt *'urSula* *Hero* je,
'ej SoH pagh latlh je buStaHvIS chaH, ja'chuq.
yIja': bong chaH vIDaqpu'. 'ej yItlhob:
SorDeS HoSchemHeyDaq yI'el; yIpegh'egh.
--- 'el Hov'a', pa' 'e' chaw'Qo'taH DuStI'e'
lutInmoHtaHbogh Hov'a'. ta'jup rur bIH;
juppu'vam HemmoH joH, 'ej Hemghach Qorghbogh
ta'vaD lutlhIvmeH Hemghachvam luDuvmoH. ---
ja'chuq chaH 'e' Da'IjlI'meH yISo''egh.
'oH Qu'Daj'e'. yIQap. latlh Hoch wIta'.
Mar: tugh ghaH vIghoSmoH, SoHvaD 'e' vIlay'.
mej
H: 'eH, *'urSula*wI', 'elDI' *be'terIS*,
QIt HevamDaq wIyIttaHvIS, pagh latlh
*be'neDIq* je buSnIS maja'chuqghach.
loDvam vIpongDI', DanaDghachDaj Dun law',
naD, 'um vay', puSqu' 'e' yIvang; qara'.
ghu'vam qaja'nIS: *be'terIS* muSHa'mo',
rop *be'neDIq*'e'. Hapvam lo'lu'taHvIS,
bangjoH'a' cha 'ong 'oghlu'; joSmo' neH
rIQmoHlaH 'oH. SIbI' yIruch! yIlegh:
'o'vo' 'el *be'terIS*
H: tuHmang rur *be'terIS*, pa' yavDaq Summo',
maja'chuqtaHghach 'IjmeH qettaHvIS.
'U: belmoHqu'bej wamghach, ngeng chIS lupe'DI'
bIQHa'DIbaH DeS SuD, 'ej maghbogh jonmeH
Soj cherlu'bogh luSopchoH, qurtaHvIS.
vaj, *be'terIS* wIwam maH. DuStIngemDaq
DaH So''egh ghaH. QIch Qu'wIjvaD HIwuv.
H: pagh belmoHbogh wIjonmeH Soj wIcherbogh
QoyHa'meH nachDaj, ghaH wIcholta'jaj.
SorDeSghomDaq Duv chaH
H: qavItbej, *'urSula*. nagh Qa' rur qa'Daj,
qu'mo' 'ej QaHQo'mo'.
'U: 'ach DIch Daghaj'a'?
*be'terIS* muSHa'qu''a' *be'neDIq*?
H: batlh 'e' luja' muSawrupbogh jaw, joH je.
'U: ghaHvaD Daja'meH nItlhob'a', jaw quv?
H: ghaHvaD vISovmoHmeH muqoy'bej chaH.
'ach chaH vIponpu': *be'neDIq* luSaHchugh,
muSHa'ghach SuvchoH ghaH, luneHtaHjaj,
'ej ghu'vam'e' not Sovjaj *be'terIS*.
'U: qatlh 'e' Davang? wa' QongDaq Do'vaD, naQvaD,
lo'taHbogh *be'terIS*, 'umbe''a' jawvam?
H: Qu'vatlh! ghaH 'um law' ghot Hoch 'umlaH puS,
reH 'e' vISov. 'a chenpu'bogh be' tIq
Hem not law', *be'terIS* tIq Hem not puS.
mInDu'Daj lIgh vaqghach vuvQo'ghach je,
'ej boch bIH, Hoch luleghbogh naDHa'taHvIS.
vanqu''egh tlhaQghachDaj; vaj, ram Hoch latlh,
'e' Harlaw' ghaH. muSHa'laHbe'ba' ghaH,
'ej pagh muSHa'ghach Qu' Daghach joq ta'laH,
parHa''eghqu'mo'.
'U: SoHvaD jIQochbe'bej.
vaj, muSHa' ghaH 'e' Sovchugh, QaQbe'bej,
'e' vaqlaHmo'.
H: bIvIt. not loD vIlegh ---
loD val, loD quv, loD Qup, loD 'IHchu' joq,
Delbe'bogh ghaH vIlegh, tIchbe'chugh ghaH.
chISchugh qab, "be'nI'wI' rur loD jay'" jach.
qIjchugh, toH, "vaqmeH cha'ghach chenmoHlu';
naDev ghIltlhtaSHey chaghlaw'." tIqchugh porgh,
"nach moH ghaj 'oy'naQvam." tIqbe'chugh 'oH,
"Ha'DIbaHvam pe'Ha'qu'lu' jay'." jatlhchugh,
"vI'wIjvaD DaH verengan qemlu'." tamchugh,
"Human vIyu'chu'meH vIjoy'nISba'."
vaj, loD Hoch vaq. not vItvaD batlhvaD je
Doch'e' DIlbogh 'Ilghach 'umghach je nob ghaH.
'U: tIchghachvam naDbe'nISlu'bej. jIQochbe'.
H: HIja': jumghach motlhQo'ghachvam'e' je
ghajlaw'bogh *be'terIS* naDQo'nISlu'.
'ach ja'meH ngIllaH 'Iv? ghaHvaD jIja'chugh,
muvaqqu'mo', tugh SIp vImoj. jItlheD'egh,
Haghmo'. mu'uy jIHeghmeH tlhaQghachDaj.
vaj, qul So'lu'bogh rurjaj *be'neDIq*.
ghaH tlhuchjaj tlhuH'a'mey. bechghachDaj peghjaj.
Heghvam qaq law' vaqghach Heghghach qaq puS.
vaqghach Hegh rur qotlhghach Hegh, maSlu'be'mo'.
'U: 'ach ghu' yIja'. nuq jatlhqang 'e' yI'Ij.
H: Qo', *be'neDIq* vIghoSbej; 'e' vImaS.
nongghachDaj SuvmeH ghaH, vIqeSbej. SuH:
nubmeH be'nI''a'wI', pumHomHey ram
vI'ogh: parHa'ghachvaD tar rurbej mu' qab.
'U: be'nI''a'lI'vaD qay'ghachvam yIta'Qo'.
va, pagh noHghach QaQ ghaHlaHbe'bej ghaH,
moDmo' 'ej povmo' yabDaj chovlu'bogh.
vaj not qaH *be'neDIq* quvqu' nayQo'.
H: puHvamDaq ghaH quv law' Hoch loD quv puS,
ghaHbe'chugh *tlhaw'DIyo*'e', bangwI''e'.
'U: jIHvaD yIQeHQo', jaw, jIjawHa'chugh:
narghghachDajmo', DaghachDajmo', toDujmo',
ja'chuqghachmo' je puHvam HochDaq ghaH
noy law', ghot Hoch latlh ja'lu'bogh noy puS.
H: HIja', pong pov 'ej quvqu' ghajba' ghaH.
'U: povmo', pong quvvaD 'um ghaH, ghajpa' ghaH.
ghorgh be'nal SoH, jaw quv?
H: toH, wa'leS, jaj Hoch latlh je. Ha', yI'el.
Sut puS qa'ang, 'ej qeSlIj'e' vItlhob:
QaQqu' wa'leS vItuQmeH Sut nuq'e'.
pegh'eghtaHvIS *Hero*vaD jatlh *'urSula*
'U: ghaH 'elmoHlaHbe'pu' mo' 'e' qalay'
wIjonpu', jaw
pegh'eghtaHvIS *urSula*vaD jatlh *Hero*
H: teHchugh, vaj po' muSHa'ghach, nuHmey Sammo'.
rut pengmey lo' bangjoH'a'; rut bIH tam mo'.
mej chaH
'etDaq ghoS *be'terIS*
Bet: nachDopwIjDaq meQ nuq? teHlaH'a' 'oH?
muqIch'a' jIHemghach vaqghach je rom?
qatlheD, vuvQo'ghach! vajHemghach, HIDoH!
ghotvam Dup retlhDaq pagh batlh ja' ghotghom.
'ej *be'neDIq*, yImuSHa'taH; qayon.
bang ghoplIjvaD tIq qu' vIjotmoHqang.
chomuSHa'chugh, jIvIDHa'mo', qapon,
'ej batlh tlhogh moj muSHa'chuqghachmaj, bang.
'um *be'neDIq*, jatlh ghot latlh; 'ej bI'um,
'e' tobbe' ja'ghach; tobpu' ghu': bIDun.
mej
3.2.
'el joH *pe'tlho*, *tlhaw'DIyo*, *be'neDIq*, *le'ona'to* je
qP: jIratlh, wej tlhoghlIj Data'taHvIS
Data'DI' *'araghon*Daq jIghoSchoH
tlh: 'oHDaq qaDor, joHwI', chochaw'chugh
qP: Qo'
tlhoghlIj bochghach chu'vaD ghIHghach 'oH wanI'vam'e'
puqvaD wepDaj chu' 'anglu'chugh, 'ej 'oH tuQ puq 'e' botlu'chugh,
rur mayHa'ghach
*be'neDIq*vaD pagh latlhvaD je tlhejghach vItlhob 'e' vIngIl,
nachDaj Dungvo' qamDu'Daj bIngDaq tlhaQghach 'oHmo' ghotvam Hoch
cha'logh wejlogh ghap bangjoH'a' cha Sorghta' ghaH,
'ej ghaHDaq bachmeH ngIlQo' petaQoyvam
jabghach qoq qawHaq rur tIqDaj, 'ej qoqvam jo' rur jatDaj,
Doch'e' Qubbogh tIqDaj tugh jatlhmo' jatDaj
Ben: SuvwI'pu' quv, DaH jIH jIHpu'bogh jIHbe'
L: 'e' vIja'
ghur SaghghachDaj 'e' vIHar
tlh: muSHa' 'e' vItul
qP: batlh Heghbe'jaj, Qovpatlhoy
ghaHDaq pagh 'Iw He teH choHlaHbogh muSHa'ghach teH tu'lu'
Saghchugh, Huch neHba'
ben: jIHvaD 'oy' Ho'
qP: yIteq
ben: toDSaH!
tlh: Dateqbe'chugh tugh DutoD pagh
vaj, bISaHbe', 'ej pISaHbe'
qP: chay'?
Ho''oy'mo' neH bep'a'?
L: Soj Hom, Qay'wI' joq tu'lu'
Ben: toH, Seng SevlaH Hoch, ghaHbe'chugh Seng ghajwI''e'
tlh: 'ach vIjatlh: muSHa'bej
qP: ghaHDaq pagh muSHa'ghach narghghach tu'lu'
'ach jech Hujmo' mISba' ghaH, 'ej moSHa' SutDaj Hoch
vaj, DaHjaj *qarDaS*ngan rur
wa'leS DIvI'ngan rur
pagh, cha' wo' rewbe' rur, quqtaHvIS
porghbotlh bIngDaq ghaH romuluSngan'e'
Qey'Ha' yopwaHDaj
'ej vaH DungDaq ghaH telunngan'e'
pagh yIvbeH tuQ
Doghghachvam maSHa' 'e' tu'laH be' moH neH
'ach ghaHbe' muSHa'ghach DoghwI''e' 'e' jutu'moHlaHbe' wIneH
tlh: pagh be' muSHa'chugh, pagh narghghach Harlu'
qaStaHvIS pomey, mIvDaj bochmoH
nuq tob ghu'vam?
qP: chIpwI'Daq ghaH leghpu''a' vay'?
tlh: ghobe'
'ach ghaH tlhej chIpwI' toy'wI' 'e' leghlu'
'ej qevpobDu'Daj 'IHmoHbogh pob ngo''e' teqlu'
DaH DoSmoQmey ghoDbej 'oH
L: HIja', DaH ghaH, QupwI' rur law', ghaH, QupwI' rurpu' puS,
lojmo' rol
qP: yIqIm
noSvagh lo'taHvIS, yach'egh
ghaH botu'laH'a', SalarghtaHvIS?
tlh: nIb ghu'vam Hoch, Dochvam je:
muSHa' QupwI'vam 'IH
qP: 'e' tobchu' 'IQghachDaj
tlh: 'ej 'IHmoHmeH qabDaj SoD ghaH
ghorgh ghaHvaD motlhpu' ghu'vam?
qP: HIja', 'ej ghorgh wovghach choHbIQ lo'pu'?
choHbIQ lo'taH 'e' jalu'law'
tlh: 'ach tobchu' tlhaQmoHpu'bogh qa'Daj
DaH beltlheghghom tlheghDaq wegh'egh
'ej 'oH SeHlaw' chuStIS SeHlaw
qP: HIja', ghaH buSbogh lut 'It'e' ja'moH ghu'vam
muSHa' 'e' yIwuq; yIwuq
tlh: 'ej ghaH muSHa' nuq 'e' vISov
qP: 'e' vISov je vIneH
ghaH muSHa' ghaH Sovbe'bogh ghot'e' 'e' vI'Iprup
tlh: ghobe', ghaH Sov
Daghachmey qab Sov je
Hochvam qelQo' 'ej ghaHvaD Heghrup
qP: bIvIt
ghaH muSHa'chugh vay', ghotvam muHnISbej
Ben: va, Ho''oy vorbe'ba' Hochvam
qaH qan, mayIttaHvIS HItlhej
maja'chuqmeH chorgh Hut joq mu''e' Qoybe'nISbogh yIntaghmeyvam vIqeqpu'
mej *be'neDIq* *le'ona'to* je
qP: ghuy'cha', *be'terIS* Sawghach ja'chuqmeH qeqpu'
tlh: teH
Qu'vamvaD lutghot Data' *Hero* *ma'rIgharet* je, SaHtaHvIS *be'terIS*
vaj HIvQo'chuq cha' 'er, ghomDI' chaH
'el boghHa'bogh qaH *jon*
qJ: joHwI' loDnI'wI' je, DaQanlu'jaj
qP: nuqneH, loDnI'
qJ: DuHmoHchugh leSghachDaj, maja'chuq vIneH
qP: mamobtaHvIS DaneH'a'?
qJ: Dachaw'chugh
'ach Qoyjaj jaw *tlhaw'DIyo*,
ghaH buSmo' Doch vIjatlhqangbogh
qP: qay' nuq?
*tlhaw'DIyo*vaD jatlh qaH *jon*
qJ: wa'leS bISaw 'e' DaHechneS'a'?
qP: Hech 'e' DaSov
qJ: 'e' vISovbe', Doch vISovbogh SovDI'
tlh: botghach vay' tu'lu'chugh, yI'angneS
qJ: qaparHa' chaq 'e' DaHarbe'
tugh 'e' tobHa'lu'jaj
'ej chochovtaHvIS Dochmo' vIjatlhrupbogh Dubjaj vI'lIj
Duvuv loDnI'wI' 'e' vIHar
'ej DuparHa'mo' tIqDaj, qaSmeH qaSbeHbogh tlhoghlIj QaH ghaH
Qu'vam ta'Ha'lu'bej 'ej vumghachvam ghaqHa'lu'bej
qP: qatlh? qay' nuq?
qJ: 'e' vIja'meH jIghoSta'
'ej ngoDHom Hoch buSmeH jIjawQo',
ghaH wIbuSpu'mo' qaStaHvIS nI'qu'wI'
matlhQo'pu' be'
tlh: 'Iv? *Hero*?
qJ: ghaH neH
*le'ona'to* *Hero*
*tlhaw'DIyo* *Hero*
loD Hoch *Hero*
tlh: matlhQo'pu''a'?
qJ: mIghghachDaj Delchu'meH 'umbe'qu' mu'vam
mIghghach vIja'laH law', mIghghach, Del "matlhQo'" puS
pong qab vay' Da'oghchugh, ghaHvaD pongvam vIlo'qang
yISaHQo', wej, tobghach latlh DaSuqtaHvIS
HItlhej neH qaStaHvIS ramvam
QongDaqpa'Daj lojmItHom 'el loD 'e' Dalegh,
tlhoghDaj jaj nungbogh ram'e' qaStaHvIS jay'
qaSDI', DamuSHa'chugh, wa'leS DaSaw
'ach HechghachlIj DachoHchugh, batlhlIj yonlu'
tlh: DuH'a'?
qP: vIHarQo'
qJ: Doch boleghbogh bovoq 'e' bongIlDI', boSov 'e' boDISQo'
tutlhejchugh, yapbogh ghu' Sa'ang
'ej ghu' boleghDI' 'ej ghu' bo'IjDI', SupabtaHvIS peruch
tlh: qaStaHvIS ramvam, vISawQo'meH meq vIleghchugh,
wa'leS jISawnISlaw'ghach qepDaq ghaH vItuHmoH jay'
qP: 'ej SoHvaD vISuqmeH ghaH jawmo',
ghaH quvHa'moHmeH qatlhej
qJ: vIpummeH pagh latlh vIjatlh, wej bejwI'pu' tlhIHtaHvIS
pejot SurIQtaHvIS, wej qaSDI' rep cha'maHloS
'ej 'ang'eghjaj ghu'
qP: QI'yaH choH jaj 'ej mIghchoH
tlh: QI'yaH bot mIghghach 'ej Huj
qJ: Qu'vatlh lot botlu' 'ej majQa',
bojatlh, wanI'leS boleghDI'
mej chaH
3.3.
'el *DoghberI*, qochDaj *verjeS* je, ngIvwI'ghom tlhejtaHvIS
D: IH jaj, qar'a'? maja'chuqjaj
SuQaQ ej SuyuNHa' tsIH?
V: QaQMej
QaQMe'chugh, NIvMa' ghotvam
ej Matschaj yaHlu'
D: Qo'
chaHvaN QIvqu' Hupghghachvam,
SaMchugh matsghach,
joH ngIvwI'ghomvaN luwIvlu'mo'
V: toH, chaHvaN Qu'chaj tIra', jIl *NoghMerI*
D: wa'NIch jIMuS:
Na' NaghghachvaN um nuq e MoQuM?
ng 1: Da' DameH 'um *'otqeq HIyu*, *qagh jorgh* joq, qaH,
ghItlhlaHmo' 'ej laDlaHmo'
D: naNev ghoS, jIl *qaghjorgh*
'etDaq gho' ngIvwI' cha'
D: jatvaN pong QaQ NaghajMa'
IHchugh ghot, noMpu' No'ghghach
a ghItschugh ej laNchugh, Noj NujNaj
ng 2: 'ej cha'vam, Da' quv ---
D: Naghaj
e Najang e vISovpu'
po'ghghachlIjmo', qaHwIj, Mats yIjats:
Hagh qoH neH, HeghtaHvIS SuvwI'
ej yImIyQo'
a narghjaj ghItsghghachlIj laNghghachlIj je,
weMghghachvam leghnISlu'NI'
ngIvwI'ghom Na' NaNaghghachvaN ummeH MIMuNQo' ej MIval
vaj wovwI' yIqeng
eH Nochvam 'oH Qu'raj:
lengha'wI' Hochvo' tsaM yIteq
ej yIt e yev ghot Hoch yItsoM, Mats ghajchugh
ng 2: chay' ghaHvaD mavang, yevQo'chugh?
D: ghaH yIqImQo', a tseN e yIchaw'
ej tugh ghommeH ngIvwI'ghom ghot lats Hoch yIra'
qeylIS yItso', lINoHmo' HeSwI'
V: yevqangMe'chugh, MotsoMNI', Mats ghajMe'Ma'
D: teHMej
ej Mats ghajMogh ghot neH MonISmeH woQ Moghaj
HemeyNaq pagh chuSghghach je yIqaSmoH
jawchugh ej jatschugh ngIvwI'ghom,
NoghMa', ej MocherghQo'lu'
ng 1: Qongghach wImaS law' jawghach wImaS puS
ngIvwI' Qu' 'oH nuq'e' 'e' wISov
D: toH, ngIvwI' ngo' ej tamqu' NaNa,
chay' mawlaH Qongghach e vIyajlaHMe'mo'
a peqIm: qutsuchmeyraj nIHMe'lu'jaj
tach Hoch yISuch ej QongNaqchajNaq yaHmeH chechwI'pu' yIra'
ng 1: chay' chaHvaD mavang, yaHQo'chugh?
D: vaj, chaHvaN penISQo', wej chechHa'taHvIS
chechHa'NI', jangghghach QaQ ta'Me'chugh,
chaHMe' MoSammeH ghot MopIHMogh e yIwuq net chaw'
ng 1: mayaj, qaH
D: nIHwI' MoqIHchugh, ghaH ghot yuN,
Qu'rajmo' chaq e MopIHlaH net chaw'
ghot Sarvam MoqelNI', chaH MotsejQo'chugh ej Motsa'Qo'chugh,
vaj, Matsraj MoleH
ng 2: ghaH nIHwI''e' 'e' wISovchugh, wIqopQo''a'?
D: teH
Moqop Qu'rajmo' net chaw'
a HumwI' NaHotchugh, vaj chu'wI' Na'uylaHMe' net Sov
nIHwI' Moqopchugh, SuSuNMe', mIwvam Molo'chugh:
tsIHvaN 'ang'eghjaj ej tsIHvo' nIHrajvo' NoHjaj
V: reH SoHvaN pung ghot ponglu', qoch
D: SavIt:
neHghghachwIjmo' wa' targh neH vImuHQo'
vaj yuNHa'ghghach ngaSMogh ghot vay''e' vImuHQo'Mej
V: qaStaHvIS ram, SaQ puq e MoQoychugh,
ghojmoqvaN yIjach ej tammoHmeH ghaH yIra'
ng 2: chay' mavang, Qongchugh ghojmoq 'ej nuQoyMe'chugh?
D: vaj, SutamtaHvIS petseN
ej SaQmo' ghaH vemmoHjaj puq
jachMogh targhHom QoyMe'chugh targhSoS,
jachMogh erHom QoyMe'Mej oH
V: teHMej
D: Qu'raj vINelta'
joH quv'e' Na'oSnIS, Na'
qaStaHvIS ram, joH NaqIHchugh, Naqop net chaw'
V: Qu'vats, net chaw'Me' e vIHar
D: jI'Iprup
qop chutmey SovwI' vay' net chaw'
a va neHnIS joH
ghot Hoch mawMe'nISMa'mo' ngIvwI'ghom
ej joH qoplu' neHMe'taHvIS, maw'
V: Qu'vats, teH e vIHar
D: Ha' Ha'
vaj qaHmey, jImej
qaSchugh pots vay', HIjach
tsa'wI'raj qeS qeSraj je yIleH
ej NaH jImej
yItsa', jIlwIj
ng 2: vaj, qaHpu', Qu'maj wIQoypu'
naDev chIrgh quS'a'Daq maMba'meH mayaHjaj,
wej qaStaHvIS rep cha'
qaSDI' QongDaq maghoS
D: wa' mu' lats, jIlmey yuNHa'
eH qaH *le'ona'to* lojmItNaq pengIv,
wa'leS pa' qaSmo' tsogh
qaStaHvIS ramvam pa' qaS mIS'a'
jImej
eH peNoy'Qo'lI'
mej *DoghberI* *verjeS* je
'el *borachIyo* *qonreyD* je
Bor: nuqneH, *qonreyD*!
ng 2: tam! vIHQo'!
Bor: jIjatlhqa'! *qonreyD*!
qO: naDev jIH, ghot
DeSlIj vISum
Bor: va, 'ej yach'oy' ghajpu' DeSwIj
vaj tugh nargh 'IwDIrHom 'e' vIHarpu'
qO: leS SoHvaD 'e' vIjang
'ach DaH lulIj yIruch
Bor: vaj vIQamtaHvIS yISum,
qachHom bIngDaq SoHtaHvIS
loQ SISmo'
'ej DaH chechwI' teH vIrur,
SoHvaD Hoch vIja'mo'
ng 2: 'urMbang vay' ruchlu', qaHpu'
'a peSo''eghtaH
Bor: vaj jIHvaD DIlmeH SanID DeQ nobta' qaH *jon* 'e' yISov
qO: DuH'a'?
Huchvam lo'lu'taHvIS waghqu'laH'a' mIghghach?
Bor: Huchvam lo'lu'taHvIS mIpqu'laH'a' mIghwI',
'e' yIyu'nIS
mIghwI' mIpbe' lo'nISDI' mIghwI' mIpqu',
DIlmeH Huch wuqlaH mIpbe'wI'
qO: mumer
Bor: bIpo'be' 'e' tob wanI'vam
loDvaD yIvbeH mIv joq wep joq Sar bIH pagh'e'
qO: bIQagh, bIH Sut'e'
Bor: 'a Sarmey vIbuS
qO: toH, Sar Sarmey
Bor: bIjatlh 'e' yImey
jatlhlaH je jIH: qoH qoHmey
'a narghghachDaj choHtaHbogh Huch lojmoHwI''e' 'oH Sarvam'e'
'e' Datu'be''a'?
pegh'eghtaHvIS jatlh ngIvwI' cha'
ng 2: *Seypcheynjer*vam vISov
qaStaHvIS Soch DIS, ghaHpu' nIHwI' quvMbe''e'
lengtaHvIS, qaH rur
pongDaj vIqaw
Bor: vay' Da'Ij'a'?
qO: ghobe', 'oH juH joqwI''e'
Bor: qajatlhqa'
narghghachDaj choHtaHbogh Huch lojmoHwI''e' 'oH Sarvam'e'
'e' Datu'be''a'?
wa'maHloS DIS wejloSvagh DIS je joj ghajbogh Qay'rupwI' Hoch'e' SuchtaH,
Doghqu'taHvIS
rut chaH, *Hologhram* lamDaq HoD *qIrq* negh rurmeH tuQmoH
rut chaH, chIrgh jIH ngo'Daq qeylIS 'utlhpu' rurmeH tuQmoH
rut chaH,
raghbogh HaSta ghIHDaq rol ghajbe'bogh Sa' *qorI'olaHneS*'e' rurmeH tuQmoH
'ej pa' naQDaj rur botlh'uSHomyoDDaj, tInmo'
qO: Hochvam vIyaj
'ej SutSarparHa'ghach, Sut lojmoH law', loD, Sut lojmoH puS
'ach SutSarparHa'ghachmo' bImaw'choH'a' je?
vaj lutlIj DawoDlaw' 'ej Sar buSbogh lut'e' DaH DatuQlaw'
Bor: teHbe'
'a yISov: qaStaHvIS ramvam,
jaw *Hero* toy'wI'vaD, *ma'rIgharet*vaD "ghghghgh" vIjatlhpu',
*Hero* pong vIlo'taHvIS
pIn'a'Daj QongDaqpa' lojmItHomvo' SIH'eghqu'
SaDlogh "qaDoH" jatlh
'a lut vIja'taHvIS jIyonbe'
ghu' wa'DIch vIja'nIS
HopwI'vo' naHSorghomDaq,
muSHa'wI' qepvam lulegh joH, *tlhaw'DIyo* pIn'a'wI' je,
ghuHmoHbogh 'ej lanbogh 'ej Qumbogh pIn'a'wI', qaH *jon*
qO: 'ej *ma'rIgharet* ghaH *Hero* 'e' luHar'a'?
Bor: Harpu' cha', joH *tlhaw'DIyo* je
'a ghaH *ma'rIgharet* 'e' Sov veqlarghHey, pIn'a'wI'
chaH QummeH 'eqbogh 'Ipmo', 'ej chaH tojbogh ram Hurghmo',
'ej pum quvbe''e' ja'bogh qaH *jon*,
tobbogh mIghghachwIj 'oHbogh potlhmo',
tlheDpu' *tlhaw'DIyo*, Qay'taHvIS 'ej 'IptaHvIS:
"qaSDI' po tlha',
chIrghDaq maghom jIH *Hero*, nabghach wIpabtaHvIS
pa', bejtaHvIS ghom'a' naQ,
qaStaHvIS ram nung, ghu' vIleghbogh lo'taHvIS, ghaH vIquvHa'moH
'ej juHDaq ghaH vIngeDqa', loDnal ghajbe'taHvIS"
ng 2: Mbatlh Mboghajchugh, yIyev 'e' wIra'
ng 1: naDev ghoSmeH Da'quv quv yIjach
'urMbang QoMbqu''e' wI'angta'
not wo'Daq 'urMbang QoMb law' 'urMbangvam QoMb puS
ng 2: 'ej chaH tlhej wa' *Seypcheynjer*
yoqvam vISov
QumwI' tuQ
qO: qaHpu', qaHpu' ---
ng 1: *Seypcheynjer* Mbo'ang net raDMbej
teHMbej
qO: qaHpu' ---
ng 2: MbIjatlh 'e' yIMbev 'e' wIra'
tlha' nuloMb
Bor: lom DImojlaH, malobQo'chugh
qO: molDaq loQ nuboQbe'jaj ghotpu'vam
Ha', relob
mej chaH
--
== == == == == == == == == == == == == == == == == == == ==
Nick Nicholas, Breather {le'o ko na rivbi fi'inai palci je tolvri danlu}
nsn@krang.vis.mu.oz.au -- Miguel Cervantes tr. Jorge LLambias
