[89933] in tlhIngan-Hol
[Tlhingan-hol] vavwI' lut - 'or
daemon@ATHENA.MIT.EDU (ghunchu'wI' 'utlh)
Tue Oct 4 10:23:31 2011
From: "ghunchu'wI' 'utlh" <qunchuy@alcaco.net>
Date: Tue, 4 Oct 2011 10:22:46 -0400
To: tlhingan-hol@kli.org
Errors-To: tlhingan-hol-bounces@stodi.digitalkingdom.org
muD Duj 'or vavwI'.
loS DujmeyDaj vIlIghpu'.
tlhoS wa' Duj mach vIqaw.
jIQupqu'taHvIS "Ercoupe" 'or vavwI'.
'oHDaq ba'laH cha' nuv.
nap Dujvam. SeHmeH 'orwI', ghopDu' neH lo'.
DermoHbe' qamDu'.
SeHwI'rutlh tlhe'chugh 'orwI', Der Duj 'ej ron.
reH quq 'ej motlh lolchu'.
QIt puv.
SuS qaDtaHvIS, rut Dujvam Do mach law' yavDuj Do mach puS.
lut tlhaQ jatlh vavwI'.
Ercoupe ghaj jup ghom.
wa' jaj yuvqu' SuS.
HoS SuS 'ej ngaD.
SuS Do tIn law' puvchoHmeH Do tIn rap.
SallaH Ercoupe-chaj Duvbe'taHvIS 'e' luSIv.
vaj lutobmeH vang.
DujDaq ba' 'orwI' tIS.
telmey 'uch latlhpu' 'ej Duj ngaDmoH.
QuQ laQ 'orwI'.
QuQ HoS ghurtaHvIS, rutlhmey bejtaH latlh.
yavDaq vIHchoHDI' rutlh, jach.
telmey pep 'uchwI'pu'...'ej SalchoH Duj.
ngaDtaHmeH Duj QuQ HoS lIStaH 'orwI'.
tagha' Duj jen law' 'uchwI'pu' jen puS.
jenqu'mo' Duj 'uchHa'nISlu'.
Qapla'!
qaStaHvIS 'op lupmey HuSlaw' Duj, vIHbe'taHvIS.
pay' choH SuS. pay' pum Duj.
pe'vIl yav mup Saqjan 'ach ghorbe'.
Do' Duj QIHbe' ngongvam.
verghDaq Duj lungaQqa'moH.
ghIq lopmeH tlhutlh chaH.
tlhutlhta''a' ngongpa'? not jIghel.
-- ghunchu'wI'
_______________________________________________
Tlhingan-hol mailing list
Tlhingan-hol@stodi.digitalkingdom.org
http://stodi.digitalkingdom.org/mailman/listinfo/tlhingan-hol
