[88836] in tlhIngan-Hol
qoqqoqmey - jaj loSmaH wej
daemon@ATHENA.MIT.EDU (ghunchu'wI' 'utlh)
Mon Feb 21 14:26:45 2011
Date: Mon, 21 Feb 2011 14:20:20 -0500
From: "ghunchu'wI' 'utlh" <qunchuy@alcaco.net>
To: tlhingan-hol@kli.org
Errors-to: tlhingan-hol-bounce@kli.org
Reply-to: tlhingan-hol@kli.org
DaHjaj mebmeyma'vaD qoq wI'agh.
jImISqa'pu'.
DaHjaj maQorbe'.
wa'leS maQor.
DaHjaj po yaHmaj wISay'moH 'ej wIghIHHa'moH.
raSmey DISay'moH.
rav wISay'moH.
DaHjaj nuSuch mebpu' le'.
ghojwI' qorDu' DIpIH.
veng DevwI' DIpIH.
ngaqmaj DIpIH.
latlh qoq ghom beq DIpIHbe'pu' 'ach DaHjaj nuSuch je chaH 'e' wISovchoH.
pawpa' chaH megh 'eq wISop.
maSopta'DI' yaH wISay'qa'moH.
mebvaD Soj lanlu'.
chabHommey, yuch, vIychorgh je lujablu'.
qoqmaj wI'agh'eghbeHmoHtaHvIS, DeSDaj ghorqa'lu'.
pawtaHvIS mebpu', qoq DeS tI'taH beq.
qeq che'ronDaq mI'taH latlh DuSaQ qoq.
Qujchu'.
SaHtaHvIS mebpu', qoq DeS tI'taH beq.
qoqmaj ngo' lulel ghunwI'ma'.
mebpu'ma'vaD HaSta noch wI'aghmeH qoq ngo' wIlo'.
mejchoHtaHvIS mebpu', qoq DeS tI'taH beq.
moghqu' ghunwI'pu'.
mejta'DI' Hoch meb, tagha' Qapqa' qoq DeS.
luwaH ghunwI' ghom.
wItob.
wIchov.
toH, mumerqu'.
DaH Qapchu' DeS pat.
'IH.
SeHlaHchu' ya.
Qap tajvaj juvwI'.
DaH maQorrupbej.
wa'leS po maghom 'ej luchmaj wIboS.
QormeH che'ron wIghoS.
pa' maHemrup.
malop! chaq wa'leS Hegh qoqmaj!
-- ghunchu'wI'
