[88721] in tlhIngan-Hol
lut pIm - puQ qup
daemon@ATHENA.MIT.EDU (ghunchu'wI' 'utlh)
Tue Feb 1 11:20:06 2011
Date: Tue, 1 Feb 2011 11:09:20 -0500
From: "ghunchu'wI' 'utlh" <qunchuy@alcaco.net>
To: tlhingan-hol@kli.org
Errors-to: tlhingan-hol-bounce@kli.org
Reply-to: tlhingan-hol@kli.org
wej Hu' juHDuj wIje'meH maleng jIH be'nalwI' je. leng wInabchoHtaHvIS,
tay' qorDu' naQ 'e' vIpIH. yabwIjDaq, HoqHom wISIQrup jIH, be'nalwI',
puqloDwI', be'nalwI' SoS je.
Do'Ha' nutlhejQo' puqloDwI'. Do' juHDaq ratlhchugh ghaH, ratlhlaH je
be'nalwI' SoS. vaj Qu' laj.
qaStaHvIS wa'maH rep maDach jIH be'nalwI' je. qaStaHvIS wa'maH rep
Qorghqang puqloDwI'. 'ach QughHom Haj. puch lo'nISchugh SoSnI'Daj, not
loD QaH laj. vaj boQwI' Sam be'nalwI'. SoSDaj Qorghpu' be'vam 'ej
juHmaj Sov.
wa'maH cha' vatlh rep mamej. wa'maH wej vatlh rep puq rI' be'nalwI'.
maj, Seng tu'lu'be'.
wa'maH loS vatlh rep paw boQwI'. wa'maH vagh vatlh rep rI' be'nalwI'.
maj, Seng tu'lu'be'.
wa'maH jav vatlh rep juHDuj wInuDchoH. wa'maH Soch vatlh rep puq rI'
be'nalwI'. va, Seng tu'lu'bej. narghpu' boQwI'. mejpu' DujDaj. mob
puqloDwI' SoSnI'Daj je.
SIbI' boQwI' rI' be'nalwI' 'e' nID. luj. jang ghogh: <janglaHbe' ghaH.
QIn yIjatlh.> ghIq taH: <'Iqmo' QInmey, buy' pat. latlh ma'laHbe'.>
ghuy'cha'. qaSpu' nuq? nuqDaq ghaHtaH? qatlh pagh ja'? mejDI' ghaH
chay' tu'be' puqloD?
wa'maH Hut vatlh rep macheghchoH. qaStaHvIS loS rep maghoS. pIj puq
rI' be'nalwI'. qejtaH SoSDaj. motlh ghu'. muqejmoHlaw' choS. qaSbe'
lot. taH puqloDwI' SoSnI'Daj je.
cha'maH wej vatlh rep juHDaq mapaw. machIjlI' 'e' wImev 'ej maDoy'.
QeHqu' be'nalwI' SoS. numuStaH. wIQaH neHbe'. Sop neHbe'. tlhutlh
neHbe'. Hergh ghupQo'. qaStaHvIS wej rep juH pa'meyDaq yIttaH. QIbDaj
Da be'nalwI'. jIQong jIH 'e' vInID.
tagha' QeHDaj natlhta' SoS. cha' vatlh rep QongDaq Qotqang. jaj veb
DungluQ QongtaHqu'.
'ach DaHjaj boQwI' Daq wISovbe'taH. narghchu'ta' ghaH.
Heghpu'be'chugh, not wIvoqqa' jay'.
-- ghunchu'wI'
