[88178] in tlhIngan-Hol
HeghHeyvo' jIchegh
daemon@ATHENA.MIT.EDU (R Fenwick)
Sun Aug 22 11:15:16 2010
From: R Fenwick <qeslagh@hotmail.com>
To: <tlhingan-hol@kli.org>
Date: Mon, 23 Aug 2010 01:02:36 +1000
Errors-to: tlhingan-hol-bounce@kli.org
Reply-to: tlhingan-hol@kli.org
Savanqu’. qep’a’ tIvlu’ ‘e’ vItul. lutIvlaw’ Hoch.
qaStaHvIS poH nI’law’ jIDachtaH; law’qu’ Qu’meywIj ‘ej Do’Ha’ tlhIngan Hol vIbuSlaHbe’, vaj jItamchoHpu’; wa’logh cha’logh ghap vay’ vIjatlh, ‘ach puSqu’. law’taH Qu’meywIj, ‘ach qaStaHvIS ret jarmey law’, tetlhDaq pIj Qumlu’ ‘e’ vItu’, ‘ej SaHtaHvIS tlhIngan Hol jatlhwI’ law’ jIjeS’eghqa’moH ‘e’ vIwuq. (qep’a’ vebvaD jIqeq je vIneH! DISvam qep’a’ lunungbogh cha’ qep’a’Daq jISaH ‘e’ vIHechqu’ ‘ach Do’Ha’ DuHbe’choH. wejlogh jIlay’Ha’Qo’.) vaj ‘op yInwIj De’ vIQum.
wej ben pIpwIj vIrIQqu’moHpu’ ghIq tI’pu’ HaqwI’ ‘e’ boSov ‘op tlhIH. tI’pu’DI’, qaStaHvIS wej DISvam, ‘ampaSDaq PhDvaD nugh ngo’ QeD vIHaDlI’. Ottoman wo’ qun vIHaD; Ottoman Satlh mIwmey HuchQeD mIwmey je vItu’meH, wa'SaD vaghvatlh ben tIr naHnaghmey je lumeQlu’pu’bogh vInuD. tugh PhD ghItlh’a’wIj vIqonpu’ ‘e’ vItul; DIS veb April May ghap, rIn ‘e’ vIHech. (jIjatlhbe’nIS «vIHech», jIjatlhnIS «rInbej»...) potlh DIS veb rInmoHpu’ghachwIj, DIS veb jIleng vIneHqu’mo’. jIHaDlI’mo’ jIvummeH, DISvam nungbogh DIS’e’ jIleng: TurkeyDaq vIjaH ‘ej pa’ chorgh Hogh
jIvumtaH. jIvumpu’DI’, jIghIQmeH latlh Sepmey - Syria, Georgia, Jordan, Greece, Egypt, U.S. je - vISuch. DIS veb jIghIQmeH neH jIleng ‘e’ vIHech. jIpIl’eghmoHtaHmeH jIHvaD ‘e’ jIlay’!
Hol’e’ jIvumtaH je, ‘a qaStaHvIS wej DISvam, Ubykh Hol vIbuStaH. qaStaHvIS wa’maH DIS, Ubykh Hol mu’ghom tIn vIgherlI’, ‘ej qaStaHvIS wa’ DISvam Ubykh pab paq vIgherlI’ je. tugh rIn mu’ghom paq wa’DIch (chen wej paqmey), ‘ej pab paq vIrInmoHpu’qu’; lulughmoHbejmeH lunuDtaH neH cha’ Hol tejpu’ vISovbogh, ‘ej tugh paq chenmoHwI’vaD vIngeHlaH. ‘ach DaH Qu’mey law’ vIbuSnIStaHbogh lutu’lu’be’ (PhD neH tu’lu’), vaj loQ tlhIngan HolvaD jIvumqa’laH. qaStaHvIS jav jarmeyvam, Worlds of Translation jInmolvaD lutwIj vIrInmoHpu’, ‘ej jIqeqmeH latlh paq vImughchoH je. Thomas Harris paq «Red Dragon» vImugh ‘e’ vInID. paq vImaSqu’bogh ‘oH. ngeDqu’ ‘ay’ wa’DIch; mumerqu’. ‘a QatlhchoHlaw’ ‘ay’ cha’DIch; HeS Dellu’meH mu’mey law’ DIghaj, ‘ach ‘op wanI’ Doch je Qatlh law’ latlh Qatlh puS. («fingerprint» «footprint» je mughmeH mu’tlheghHom nap SovchoHchugh vay’, HIchuH. muqaDtaH mu’meyvetlh...)
toH, yap. ‘ach naDev vIcheghmo’ jIbel.
pItlh.
QeS ‘utlh
