[88040] in tlhIngan-Hol
qo' Huj vISuch
daemon@ATHENA.MIT.EDU (ghunchu'wI' 'utlh)
Mon Jul 19 14:30:06 2010
Date: Mon, 19 Jul 2010 14:15:59 -0400
From: "ghunchu'wI' 'utlh" <qunchuy@alcaco.net>
To: tlhingan-hol@kli.org
Errors-to: tlhingan-hol-bounce@kli.org
Reply-to: tlhingan-hol@kli.org
qen Hoq vIpIHbe'bogh vISIQ.
ghIQmeH qorDu'wIj Wyoming wIjaHpu' 'e' wInab. pa' raQ Dun wISov.
ngechDaq 'oH raQ'e'. retlhDaq vIH bIQtIq. Sum ngeng tuj. pa' maghIQ
reH 'e' wItIv. qaStaHvIS loS DIS raQvamDaq malenglaHbe'. DISvam nabmo'
wISey'choH. Do'Ha' QapHa' Duj wIngIpbogh 'ej nabmaj wIqIlnIS. (chaq
QapHa'ghach vIDel. chaq vIDelbe'. jIwuqta'be'.)
jaS manabchoH. Wyoming leng wIlon 'ej Florida wIjaH 'e' wIwIv. pa'
be'nalwI' SoS juHHom wIDanlaH. QongDaqmey tun ghaj juHHom. bIQ'a'
HeHDaq Qan qach. ngeng ngeb ghaj je. Hoch jaj bIQDaq HaH'egh
be'nalwI'. pIj vItlhej. roD pa'mey bIrDaq ratlh puqloDwI' puj. :P loQ
qetlh Hoghmaj 'ach maQuch. maleS. rut Qe'Daq maSop. raQ lutlh
'oHbe'bej jay'.
juHvengmajDaq macheghtaHvIS Orlando-Daq mayev. pa' wa' jaj le'
wInabta'. qo' le' wISuch. Do'Ha' Hoqmaj vIDellaHchu'be'. yapHa'
tlhIngan Hol mu'tay. DIvI' Hol pong vIlo'nIS: "The Wizarding World of
Harry Potter"
vengHom cherlu'pu'. cha' lut Daqmey quq rur. wa' HeDaq "Diagon Alley"
Suymey, "Hogsmeade" tachmey je DIlegh. vengHom 'evDaq qach'a' wIlegh.
Hogwarts DuSaQ 'oHchu'. tInqu'. Dojqu'. pupqu'. nuvtlhegh wImuv 'ej
QIt maloS. tagha' qach'a' wI'el 'ej pa'mey Dun DIlegh. nuja' DuSaQ
la''a'. nuja' naghmey beQ. nuja' wej ghojwI' noy' 'ej nabHey luqagh --
qun ghojmoHwI' Dal wIjunlaH 'ej Quiddich Quj wIbejlaH. nuja' buvmeH
mIv 'ej bomtaHvIS nughuHmoH: <SulIghtaHvIS peyep! lItlhejlaHbe'qu'
tep! QojlaH quSmeyvam Huj. SIQlaHbe' lIghwI' puj. bIropmoHlaHchugh Do,
qoj tlhoy' quS tebchugh ro, vaj DaH vu'wI' Daja'. bIlIghlaHbe'.
Do'Ha'. > quS le'Daq maba'. pe'vIl porghmaj DechchoH 'uchwI' Qey.
manarghlaHbe'. vIHqu' quS. nech. Sup. ron. Der. tor. puv. chung. Sal.
pum. HuS. qach'a' wIvegh. qach'a' HurDaq wIleng. bong qul lung wIghom
'ej nutlha'. Quj yotlh wI'el. tlhoS Quj'e' wI'el. nuHIvchoH
veqlarghpu'. pay' ngem Hurgh wIveghlI', ghIq nutlhaw'taH Sor, ghIq
qach'a' wI'elqa' 'ej nuHoy' Hoch. rIn.
qaStaHvIS wa' rep bIt burghwIj.
bItbe'choHDI', nImHIq (butterbeer) vItlhutlh. 'eyqu'!
wa' nem Wyoming raQ wIjaH 'e' wInIDqa'.
-- ghunchu'wI'
