[83834] in tlhIngan-Hol
qID chu' vIghojpu'.
daemon@ATHENA.MIT.EDU (Doq)
Sat Jan 5 00:18:11 2008
From: Doq <doq@embarqmail.com>
To: tlhingan-hol@kli.org
Date: Sat, 5 Jan 2008 00:14:21 -0500
Errors-to: tlhingan-hol-bounce@kli.org
Reply-to: tlhingan-hol@kli.org
nom Hatlh He'Daq puHDuj 'or vengngan. leng. nom ghoSlaHmo' DujDaj,
'eDjen ghaH.
pay' 'o'vo' 'etDaq DujDaj juSchu' cha'bIp. cha'bIp qammo' lamchoH muD.
muD lammo', lamchoH DujDaj. moghchoH.
cha'bIp juSmeH, chung, 'ach Qu'vam ta'laHbe'. chollaH, 'ach not
cholchoHchu'. loQ cholta'DI', cha'bIp nuD. merchu' ghu'.
wej 'uS ghaj cha'bIpvam.
nom Du' yotlhDaq tlhe' cha'bIpvam. nom ghoSqu'mo' Duj, tlhe'laHbe'.
QIt mev. Du'Daq chegh.
merqa' ghu'. Du'Daq Dat qetchu' wej 'uS ghajbogh cha'bIpmey law''e'.
Doj Dochaj.
DujDajvo' Du' juHDaq ghoSmeH yIt. wejlogh lojmIt qIp. rI'.
chol Du'ngan. jatlh <<nuqneH!>>
jatlh vengngan <<cha'bIpmeyvam lut 'oH nuq'e'? wej 'uS ghaj! yIQIj!>>
QIt jatlh Du'ngan <<jISopmeH, 'uS vImaS. SopmeH be'nalwI', 'uS maS.
SopmeH puqloDwI', 'uS maS.>>
ngoDvam qel vengngan. Qub. jatlh <<toH, 'ey'a'?>>
tlhob Du'ngan. jatlh <<jISovbe'. wej wa' vIjonta'.>>
pItlh.
[qIDvam Dayajbe'chugh, jInIDqa':]
tlhob Du'ngan. jatlh <<jISovbe'. not wa' vIjonta'.>>
mu' <<wej>> tlhaQ law' mu' <<not>> tlhaQ puS, 'ach mu' <<wej>>
yajHa'luH. mI' 'oHbe'.
Doq
